你从何处来,要到何处去_(´v`」 ∠)_
© 云鲤鲤鱼
Powered by LOFTER

我觉得住我楼上嘅男人有啲唔妥2

Summary:和Steve一夜情后怀了BB的Bucky住到了“我”家楼上,并让“我”冒充他的男朋友以向Steve隐瞒BB爸爸的身份

全粤语,部分字不能确定正确写法是什么,欢迎捉虫!


“我可唔可以冒昧问一下……”

坐我对面嘅人霎时岳高头,语气不善:“咩?”

我本身想问问佢究竟要食几多碟点心先正够皮,虽然主动提出要请饮茶当道歉嘅係我,但我并冇打算将成副身家抌入去——佢一碟接一碟冇停过口,影真令人心慌慌。

佢一旧实我,我即刻冇骨气咁改口:“我惊你唔够食,想问问你使使再加嘢。”

“唔使。”

谢天谢地!我心入边大声欢呼,点知佢仲未讲完。呢位索到人个心啰啰挛、等人错觉佢不食人间烟火嘅男人巡视咗一下台面,客客气气同我讲,“我想留翻个肚等阵饮糖水。”

我顶!仲饮得落糖水,係唔係痴线架?!我小心讲出心底疑问:“你一个月喺食方面开销有几大?”

佢举起茶杯细细饮咗一啖,“一千。”

“美圆?”

“人民币。”

“唔係挂,你今餐就起码食咗五旧水了啵,仲未计等阵嘅糖水。”

“哦,我平时唔食咁多。”

“……你有冇听讲过杜甫,你知知佢係点死嘅?佢就係平时食小小,跟住有日突然之间食好多,就胀死了。”

“哦?”

“我,我嘅意思係,你平时点解唔食多啲?你食多啲都照样够好睇。”

“我容易肥,”佢成面唔开心,“食少啲,我比较好睇。”

我从未见过人连唔开心个样都咁得人钟意,忍唔住安慰佢:“先唔讲就算你肥小小都唔影响你个样,你宜家大肚嚄,攞咁好睇做乜?”

佢嘴秒秒咁:“有个傻仔我走到边就追到边,都唔鸠知佢究竟想点。”

我对耳仔即刻竖咗起身,“你讲果个,同埋过几日会嚟揾你嘅係唔係同一个人?”

我见到佢明显全身一震,跟住一副若无其事嘅样,“唔。”

“你唔想佢揾你咩?”

“唔想。如果佢唔再来烦我,我就可以日日放开食了。

“你唔钟意佢?”

楼上个男人即刻恶死楞登咁望住我,“关你叉事。”

我口窒窒,“我,我就是旦问问,冇恶意。我喺度谂,既然你care喺佢面前嘅形象,又、又同佢发生过关系,即係对佢有翻咁上下好感?而佢四周围揾你,应该係几着紧你,既然你地BB都有咗咯,点解唔喺一齐试试?”

佢冇出声,但我分明见到佢颜色艳丽嘅嘴唇无声吐咗“傻西”两个字。

真係攞命,我唔单止一啲都唔嬲,反而个心跳得好快。但係就算畀我一百个胆,我亦唔敢对面前呢个男人有非分之想,因为根据我推测,佢就係之前被全世界通缉嘅危险人物,James Barnes——或者应该称呼佢为冬兵。

不过喺呢个通缉令之前,我就已经对佢有所听闻了,但唔係因为佢本身,而係因为佢有个叫Steve嘅朋友——世界上叫做Steve嘅人数不胜数,单单从B仔嘅历代男朋友入边数就有超过五个Steve——但係呢个Steve对我来讲比较特别,唔怕话,我从小学开始,最崇拜嘅超级英雄就係美国队长,Steve Rogers。

我灵光一闪,係了,既然冬兵係美队嘅朋友,美队应该唔会由得佢乱来至啱。我旁敲侧击:“你自己一支公嚟到呢度,你身边冇人反对咩,比如你啲特别正直好人嘅朋友?”

佢把声冷若冰霜,“唔好再问。”

我尴尬咁摸摸块面:“你慢慢食,我去去洗手间。”

佢并冇苏我。

去完厕所翻来,令我意外嘅係,属于我嘅位置隔离无喇喇多咗个人,我皱皱眉头行过去,想同住我楼上个男人声明唔可以邀请人过来一齐食,但我啱行埋去,立即吽咗係度。

我对眼撑到大晒,啊大个嘴半日先醒翻起身点讲嘢:“你,你係美国队长?!我係你嘅fan啊,我细细个就超级崇拜你了,你可唔可以签个名畀我?”

面前呢个金发碧眼、同贴喺我间房嘅海报生得一模一样嘅男人望向我,用英文讲:“唔好意思,我听唔你讲的说话。”

係嚄,兴奋到讲白话添!我正想用英文重复一次,但住我楼上嘅男人突然一嘢摙住我条手臂,语气平淡,“我啱啱提到嘅,我男朋友。”

霎时间,我犹如畀十道雷劈中。

我顶,所以话,果个将住我楼上个男人——或者讲将冬兵搞大肚嘅,就係美国队长?!


TBC

评论(34)
热度(78)